अनादी काळापासून माणसाला त्याच्या सर्व समस्या सोडवण्यासाठी भगवंताचे नामस्मरण करण्यास सांगितले जाते. परंतु सामान्य प्रापंचिक माणसाला नामस्मरणाची साधना करणे खूप कठीण किंवा जवळजवळ अशक्यच आहे. विश्वप्रार्थना सातत्याने म्हटल्याने आपल्या समस्या सुटतात आणि त्याचे सुपरिणाम आपण अनुभवू शकतो. या प्रार्थनेतील शब्दांचे अर्थ सहज लक्षात येतात. त्यामुळे त्यासोबत आपल्या भावना आणि कल्पना जोडल्या जाऊन त्याप्रमाणे कल्पनाचित्र आपण डोळ्यासमोर आणू शकतो. विश्वप्रार्थना कोणतेही गुतांगुतीचे किंवा समजण्यास अवघड असे तत्वज्ञान सांगत नाही. विश्वप्रार्थनेमुळे माणुसकीची भावना जागृत होते.

विश्वप्रार्थना म्हणता म्हणता प्रार्थनेतील 'सर्वांना' या शब्दाची कक्षा आपण हळूहळू व्यापक करु शकतो आणि माणसाच्या पलीकडे असलेले प्राणी, पक्षी, झाडे आणि पृथ्वी, पाणी, अग्नी, वायू, आकाश अशा गोष्टींचा देखील त्यात समावेश करू शकतो. जेव्हा आपल्याला विश्वप्रार्थना दररोज म्हणण्याची सवय लागते तेव्हा आपल्या आजूबाजूचे हे घटक सुद्धा आपल्यासोबत सुसंवाद साधू लागतात.

हा कोणताही चमत्कार नसून त्यामागे शुद्ध वैज्ञानिक तत्त्व आहे. क्रिया तशी प्रतिक्रिया हा भौतिकशास्त्राचा साधा नियम आहे. जेव्हा आपण मनापासून प्रार्थना म्हणतो तेव्हा वातावरणात सकारात्मक विचारांची स्पंदने प्रक्षेपित होतात आणि निसर्गनियमानुसार वातावरणातील त्याच प्रकारची स्पंदने आपल्याकडे आकर्षित होतात.